Filozofia

Shpeshherë kam hyrë në Atelienë e Gani Gashit… Edhe kur vjeshta ngjyroste gjethet, edhe kur era frynte egër. Në atelienë e piktorit G.G. nuk kishte asnjë pasqyrë. Vetëm piktura të lëvarura nëpër muret e bardha ngjyrë akulli. E kam parë piktorin G.G. të lodhur dhe të verdhë në fytyrë. I kam shikuar edhe pikturat një nga një… I kam lexuar në mënyrën time sikur të ishin libra ku flet secila ngjyrë. E kam zbuluar një botë krejt tjetër siç nuk e kisha parë kurrë. I kam shikuar edhe me sy të mbyllur… I kam fërkuar edhe duart. Interesant, kam dëgjuar edhe një muzikë + dialogun dhe monologun e ngjyrave. E kam pyetur veten: A është e mundur” E kam ndier zërin e brenshëm: Po. Po. Ngjyrat flasin edhe me dhembje. Ky është arti që me pak thotë shumë. Edhe kolazhi ka formë moderne. Thellësi magjike kanë edhe peizazhet. Shihet një përmbysje e imitimit duke u plotësuar me një imagjinatë të re. Edhe uji, po edhe guri i lidhur flet.

 

Secila pikturë me tjetrën kanë një kompozicion shumëdimensional dhe shprehje semantike universale. Edhe në vija të holla, edhe në vija të trasha, çdo pikturë e këtij artisti mund të lexohet si metaforë kozmike. E kjo nuk është pak. Herë-herë ngjyrat janë lirike, herë-herë edhe shqetësuese e me dramë përbrenda, herë-herë të ftohta. Edhe ngjyra e kaltër e fortë krijon tension. Edhe ngjyra e bardhë dhe e zezë sugjerojnë imazhe poetike. Thash: Është një artist i përveçëm. Që vazhdimisht po gjurmon një GJUHË TË RE artistike me një thyerje të fortë të shprehjes moderne dhe universale. Gani Gashi është piktor i figurës dhe i metaforës. Me një gjuhë jo të zakonshme të ngjyrave ka krijuar një pavarësi estetike. Një gjuhë që e përtërin vetveten. Edhe imazhet poetike i ka të veçanta. Vazhdimisht ndjek aventurat e artit modern, duke ngulmuar të sjellë shprehje të reja semantike si dhe sinjale filozofike me një strukturë të brendshme, vokacion të fortë dhe harmoni poetike.

 

Me veprat e tij, ky artist aplikon në artin e sotëm larminë e teknikave moderne, botën e veçantë, qoftë nëpërmjet formave gjeometrike ose shprehjeve abstrakte. Lirshëm mund të thuhet: ka shkuar me larg se mësuesit e tij të dikurshëm që në fillim kishin bërë një ndikim deri në shlirim të mëvetësishëm të shprehjes.